LIVE TV
തിരുവനന്തപുരം: വിക്രം സാരാഭായ് സ്പേസ് സെന്ററിലെ ടെക്നീഷ്യന് തിരഞ്ഞെടുപ്പിനുള്ള പരീക്ഷയില് തട്ടിപ്പ് നടത്തിയ പ്രതികള്ക്കെതിരെ മറ്റ് സംസ്ഥാനങ്ങളിലും സമാനകേസുകള്. പഞ്ചാബിലും ഹരിയാനയിലും സമാനമായ കേസുകള് പ്രതികള്ക്കെതിരെ നിലവിലുണ്ട്. ഒഡിഷയിലും തമിഴ്നാട്ടിലും തട്ടിപ്പ് നടന്നതായും പൊലീസ് സംശയിക്കുന്നു. ഈ സാഹചര്യത്തില് അന്വേഷണം പൊലീസ് സിബിഐക്ക് കൈമാറിയേക്കും.
ഡിആര്ഡിഒ, വിഎസ്എസ്സി എന്നിവ നടത്തുന്ന പരീക്ഷകളിലാണ് കൂടുതലും ക്രമക്കേട് നടത്തിയിട്ടുള്ളത്. പ്രതികള് ചോദ്യം ചെയ്യലില് സഹകരിക്കാത്തതും പൊലീസിനെ കുഴക്കുകയാണ്. ഹരിയാനയില് നിന്നും പിടിയിലായ പ്രധാന പ്രതി ദീപക് ഉള്പ്പെടെയുള്ള പ്രതികള് പൊലീസിന്റെ ചോദ്യങ്ങളോട് സഹകരിക്കുന്നില്ലെന്നാണ് വിവരം. കേസില് ഇതുവരെ 9 പ്രതികളാണ് അറസ്റ്റിലായിരിക്കുന്നത്. മറ്റ് പ്രതികള് ഒളിവിലാണ്.
തട്ടിപ്പ് പുറത്തുവന്നതോടെ വിഎസ്എസ്സി പരീക്ഷ റദ്ദാക്കിയിയിരുന്നു. പരീക്ഷ എഴുതിയ മുഴുവന് പേരുടേയും പട്ടിക വിഎസ്എസ്സിയില് നിന്നും പൊലീസ് ശേഖരിച്ചിട്ടുണ്ട്. കോപ്പിയടി നടന്ന സാഹചര്യത്തില് ഐഎസ്ആര്ഒ പരീക്ഷാ കേന്ദ്രങ്ങളില് സുരക്ഷ ശക്തമാക്കാനാണ് തീരുമാനം. പുതിയ പരീക്ഷകള് പുതുക്കിയ മാനദണ്ഡത്തിന്റെ അടിസ്ഥാനത്തിലാവും നടത്തുക.
