LIVE TV
പ്രശസ്ത അമേരിക്കൻ നടിയും മോഡലുമായിരുന്ന മെർലിൻ മൺറോയുടെ വീട് ഇനി ചരിത്ര-സാംസ്കാരിക സ്മാരകമാകും. ലോസ് ഏഞ്ചൽസിലെ ബ്രെൻ്റ്വുഡിലുള്ള മെർലിൻ മൺറോയുടെ വീട് പൊളിക്കാൻ തീരുമാനിച്ചിരിക്കെയാണ് ലോസ് ഏഞ്ചൽസ് സിറ്റി കൗൺസിലിന്റെ തീരുമാനം. വീട് ചരിത്ര-സാംസ്കാരിക സ്മാരകമായി ഔദ്യോഗികമായി കൗൺസിൽ പ്രഖ്യാപിച്ചു.
സ്പാനിഷ് കൊളോണിയൽ ശൈലിയിലുള്ള ഈ വീട്ടിലാണ് മരിക്കുന്നതിന് മുൻപുള്ള ആറ് മാസക്കാലം താരം താമിസിച്ചിരുന്നത്. 1962-ൽ സിനിമയിൽ ശ്രദ്ധേയയായ ശേഷം മെർലിൻ സ്വന്തമായി വാങ്ങുന്ന ആദ്യ വീടാണ് ഇത്. നിലവിലെ ഉടമസ്ഥരായ ബ്രിന മിൽസ്റ്റീനും ഭർത്താവ് റോയ് ബാങ്കും കഴിഞ്ഞ വർഷമാണ് 8.35 മില്യൺ ഡോളറിന് വീട് വാങ്ങിയത്. തങ്ങളുടെ വസ്തു വികസിപ്പിക്കുന്നതിന്റെ ഭാഗമായി ദമ്പതിമാർ വീട് പൊളിക്കാൻ തീരുമാനിക്കുകയായിരുന്നു.
എന്നാൽ ഇതോടെ സാമൂഹിക പ്രവർത്തകർ എതിർപ്പറിയിച്ചു. വീടിന് മാറ്റങ്ങൾ വരുത്തിയെന്നും മൺറോയുടെ ചരിത്ര അവശേഷിപ്പുകൾ ഇവിടെയില്ലെന്നുമായിരുന്നു ദമ്പതികളുടെ വാദം. മാത്രമല്ല, വീട്ടിലേക്ക് സന്ദർശകർ വരുന്നത് തങ്ങളുടെ സ്വകാര്യ ജീവിതത്തെ ബാധിക്കുന്നുവെന്നും പൊളിക്കുന്നതിന് കാരണമായി വാദിച്ചുകൊണ്ട് ദമ്പതികൾ വീട് പരാതി നൽകി.
ഈ കേസിന്റെ വാദം ഓഗസ്റ്റ് 13 ന് പരിഗണിക്കാനിരിക്കെയാണ് ഉടമകളുടെ എതിർപ്പ് അവഗണിച്ചുകൊണ്ട് സിറ്റി കൗൺസിൽ വീടിന് ചരിത്രപരമായ പദവി നൽകിയത്. പദവി നൽകിയത് കൊണ്ട് വീട് പൊളിക്കൽ നടപടി പിൻവലിക്കാൻ സാധിക്കുന്നതല്ല. എന്നിരുന്നാലും ഇത് ഉടമകളുമായി കൗൺസിലിന് ഒരു ചർച്ചയ്ക്ക് വഴിവെക്കുമെന്ന് കൗൺസിൽ പ്രതീക്ഷിക്കുന്നുണ്ടെന്നും മൺറോയുടെ ഐതിഹാസിക ജീവിതം തിരിച്ചറിയേണ്ടതിൻ്റെയും ബ്രെൻ്റ്വുഡ് വീട് സംരക്ഷിക്കേണ്ടതിൻ്റെയും പ്രാധാന്യം ഊന്നിപ്പറഞ്ഞു കൊണ്ട് കൗൺസിൽ അംഗം ട്രാസി പാർക്ക് പറഞ്ഞു.
മുപ്പത്തിയാറാമത്തെ വയസ്സിലാണ് മെർലിൻ മൺറോയുടെ അപ്രതീക്ഷിത മരണം സംഭവിക്കുന്നത്. മുപ്പതോളം ചിത്രങ്ങളിൽ മാത്രമേ അഭിനയിച്ചിട്ടുള്ളൂവെങ്കിലും മൺറോ ഹോളിവുഡിനെ ലഹരി പിടിപ്പിച്ച താരമാണ്. മാത്രമല്ല, മർലിൻ മൺറോയുടെ മരണം ഇന്നും ദുരൂഹമായി തുടരുകയാണ്.
മൈലാഞ്ചി മൊഞ്ചിൽ മീര, ഹൽദിയിൽ സ്റ്റാറായി നസ്രിയ; വിവാഹ ആഘോഷങ്ങൾ തുടങ്ങി
